ਗਾਇਕਾ ਸੁੱਖੀ ਬਰਾੜ ਨੇ ਕਲਾਕਾਰਾਂ ਦੀ ਸਿਕਓਰਿਟੀ ਵਾਪਸ ਲਏ ਜਾਣ ‘ਤੇ ਦਿੱਤਾ ਪ੍ਰਤੀਕਰਮ, ਜਾਣੋ ਗਾਇਕਾ ਨੇ ਕੀ ਕਿਹਾ

ਗਾਇਕਾ ਸੁੱਖੀ ਬਰਾੜ (Sukhi Brar)ਆਪਣੇ ਬੇਬਾਕ ਬੋਲਾਂ ਦੇ ਲਈ ਜਾਣੀ ਜਾਂਦੇ ਹਨ। ਉਹ ਅਕਸਰ ਕਈ ਮੁੱਦਿਆਂ ‘ਤੇ ਆਪਣੀ ਰਾਇ ਦਿੰਦੀ ਹੋਈ ਨਜ਼ਰ ਆਉਂਦੇ ਹਨ। ਹੁਣ ਉਸ ਦੇ ਨਾਲ ਜੀਟੀਸੀ ਪੰਜਾਬੀ ਦੇ ਖ਼ਾਸ ਗੱਲਬਾਤ ਕੀਤੀ ਹੈ। ਇਸ ਗੱਲਬਾਤ ਦੇ ਦੌਰਾਨ ਉਨ੍ਹਾਂ ਨੇ ਗਾਇਕਾਂ ਦੀ ਸਿਕਓਰਿਟੀ ਵਾਪਸ ਲਏ ਜਾਣ ‘ਤੇ ਪ੍ਰਤੀਕਰਮ ਦਿੱਤਾ ਹੈ। ਸੁੱਖੀ ਬਰਾੜ ਨੇ ਕਿਹਾ ਕਿ ਹਾਲਾਂਕਿ ਮੈਨੂੰ ਇਨ੍ਹਾਂ ਮੁੱਦਿਆਂ ਦੇ ਬਾਰੇ ਜ਼ਿਆਦਾ ਪਤਾ ਨਹੀਂ ਹੈ। ਉਨ੍ਹਾਂ ਨੇ ਕਿਹਾ ਪਹਿਲਾਂ ਗਾਇਕਾਂ ਨੂੰ ਕਿਸੇ ਵੀ ਤਰ੍ਹਾਂ ਦੀ ਸਿਕਓਰਿਟੀ ਦੀ ਲੋੜ ਨਹੀਂ ਸੀ ।

ਉਨ੍ਹਾਂ ਨੇ ਕਿਹਾ ਕਿ ਪੰਜਾਬ ‘ਚ ਹੁਣ ਜਿਵੇਂ ਕਿ ਗਾਇਕਾਂ ਨੂੰ ਧਮਕੀਆਂ ਮਿਲਣ ਲੱਗ ਪਈਆ ਨੇ ਇਸੇ ਕਰਕੇ ਕਲਾਕਾਰਾਂ ਨੂੰ ਸਿਕਓਰਿਟੀ ਦੀ ਲੋੜ ਪਈ ਹੈ ਅਤੇ ਕਲਾਕਾਰਾਂ ਨੂੰ ਸੁਰੱਖਿਆ ਮਿਲਣੀ ਵੀ ਚਾਹੀਦੀ ਹੈ। ਪੰਜਾਬ ‘ਚ ਕਦੋਂ ਕਿਸੇ ਦੇ ਗੋਲੀ ਮਾਰ ਦੇਣੀ ਇਹ ਕੋਈ ਪਤਾ ਨਹੀਂ । ਹਾਲਾਂਕਿ ਮੈਨੂੰ ਨਹੀਂ ਪਤਾ ਇਹ ਸਭ ਕੁਝ ਕਿਉਂ ਹੋ ਰਿਹਾ । ਇਸ ਦੇ ਨਾਲ ਹੀ ਮਜੀਠੀਆ ਦੇ ਨਾਲ ਗੱਲਬਾਤ ਕਰਨ ਤੇ ਜੌਰਡਨ ਸੰਧੂ ਦੀ ਸਿਕਓਰਿਟੀ ਵਾਪਸ ਲੈਣ ‘ਤੇ ਉਨ੍ਹਾਂ ਕਿਹਾ ਕਿ ਕਲਾਕਾਰ ਸਭ ਦੇ ਸਾਂਝੇ ਹੁੰਦੇ ਹਨ । ਭਾਵੇਂ ਕੋਈ ਵੀ ਹੋਵੇ ਬੋਲੀ ਪਾਉਣਾ ਕੋਈ ਮਾੜਾ ਕੰਮ ਨਹੀਂ । 

ਗੰਨ ਕਲਚਰ ‘ਤੇ ਵੀ ਪ੍ਰਤੀਕਰਮ 

ਇਸ ਮੌਕੇ ਉਨ੍ਹਾਂ ਨੇ ਗੰਨ ਕਲਚਰ ‘ਤੇ ਵੀ ਪ੍ਰਤੀਕਰਮ ਦਿੰਦਿਆਂ ਹੋਇਆਂ ਕਿਹਾ ਕਿ ‘ਹੁਣ ਕੁੜੀਆਂ ਵੀ ਗਾਣਿਆਂ ‘ਚ ਬੰਦੂਕਾਂ ਚੁੱਕੀ ਫਿਰਦੀਆਂ ਨੇ, ਇਹੀ ਕਾਰਨ ਹੈ ਕਿ ਕਲਾਕਾਰਾਂ ਨੂੰ ਸੁਰੱਖਿਆ ਮੰਗਣੀ ਪੈਂਦੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਤਾਂ ਕਲਾ ਵੰਡਦੇ ਹਾਂ ਅਤੇ ਕਿਸੇ ਨੂੰ ਵੀ ਪੱਖਪਾਤ ਨਹੀਂ ਕਰਨਾ ਚਾਹੀਦਾ । 

ਸੁੱਖੀ ਬਰਾੜ ਸਿਆਸਤ ‘ਚ ਆਉਣਗੇ !

ਸੁੱਖੀ ਬਰਾੜ ਦਾ ਕਹਿਣਾ ਹੈ ਕਿ ਸਿਆਸਤ ‘ਚ ਆਉਣ ਦਾ ਉਨ੍ਹਾਂ ਦਾ ਕੋਈ ਇਰਾਦਾ ਹਾਲੇ ਤੱਕ ਨਹੀਂ ਹੈ। ਜੇ ਉਹ ਸਿਆਸਤ ‘ਚ ਆਉਣਗੇ ਵੀ ਤਾਂ ਠੋਕ ਵਜਾ ਕੇ ਆਉਣਗੇ । 

- GTC PUNJABI