ਜੀਟੀਸੀ ਪੰਜਾਬੀ ਵੱਲੋਂ ‘ਜਸਵਿੰਦਰ ਭੱਲਾ ਮੈਮੋਰੀਅਲ ਜੀਟੀਸੀ ਕਾਮੇਡੀ ਅਵਾਰਡ’ ਦਾ ਕੀਤਾ ਗਿਆ ਐਲਾਨ

ਬੀਤੇ ਦਿਨੀਂ ਜਸਵਿੰਦਰ ਭੱਲਾ ਦਾ ਜਨਮ ਦਿਨ ਸੀ। ਇਸ ਮੌਕੇ ‘ਤੇ ਜੀਟੀਸੀ ਪੰਜਾਬੀ ਦੇ ਵੱਲੋਂ ਉਨ੍ਹਾਂ ਦੀ ਯਾਦ ‘ਚ ਜੀਟੀਸੀ ਕਾਮੇਡੀ ਅਵਾਰਡਾਂ ਦੀ ਸ਼ੁਰੂਆਤ ਦਾ ਐਲਾਨ ਕੀਤਾ ਗਿਆ ਹੈ। ਇਹ ਪਹਿਲਾ ਮੌਕਾ ਹੈ ਜਦੋਂ ਕਾਮੇਡੀ ਅਵਾਰਡ ਸ਼ੋਅ ਦਾ ਐਲਾਨ ਕੀਤਾ ਗਿਆ ਹੈ। ਜੀਟੀਸੀ ਨੈੱਟਵਰਕ ਦੇ ਸੰਸਥਾਪਕ ਤੇ ਮੈਨੇਜਿੰਗ ਡਾਇਰੈਕਟਰ ਡਾ. ਰਾਬਿੰਦਰ ਨਰਾਇਣ ਨੇ ਮਰਹੂਮ ਕਾਮੇਡੀਅਨ ਤੇ ਅਦਾਕਾਰ ਜਸਵਿੰਦਰ ਭੱਲਾ ਦੇ ਜਨਮ ਦਿਨ ‘ਤੇ ਆਯੋਜਿਤ ਕੀਤੇ ਗਏ ਸਮਾਗਮ ਦੇ ਦੌਰਾਨ ਇਨ੍ਹਾਂ ਪੁਰਸਕਾਰਾਂ ਦਾ ਐਲਾਨ ਕੀਤਾ ਹੈ।

ਇਸ ਮੌਕੇ ‘ਤੇ ਪੰਜਾਬੀ ਇੰਡਸਟਰੀ ਦੀਆਂ ਉੱਘੀਆਂ ਤੇ ਨਾਮਵਰ ਹਸਤੀਆਂ ਸ਼ਾਮਿਲ ਸਨ । ਜਿਸ ‘ਚ ਕਰਮਜੀਤ ਅਨਮੋਲ, ਸ਼ੈਰੀ ਮਾਨ ਅਤੇ ਜਸਵਿੰਦਰ ਭੱਲਾ ਦੇ ਪੁੱਤਰ ਪੁਖਰਾਜ ਭੱਲਾ ਵੀ ਮੌਜੂਦ ਰਹੇ । ਇਸ ਸਮਾਗਮ ‘ਚ ਪੰਜਾਬ ਦੇ ਸੈਰ ਸਪਾਟਾ ਤੇ ਸੱਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਤਰੁਣਪ੍ਰੀਤ ਸਿੰਘ ਸੌਂਧ ਵੀ ਸ਼ਾਮਿਲ ਹੋਏ ਸਨ। 

ਇਸ ਸਮਾਗਰਮ ਦੇ ਦੌਰਾਨ ਬੋਲਦੇ ਹੋਏ ਡਾ.ਰਾਬਿੰਦਰ ਨਰਾਇਣ ਨੇ ਕਿਹਾ ਕਿ “ਜਸਵਿੰਦਰ ਭੱਲਾ ਦਾ ਕੰਮ ਕਾਮੇਡੀ ਤੋਂ ਪਰੇ ਹੈ। ਉਨ੍ਹਾਂ ਨੇ ਮਰਹੂਮ ਜਸਵਿੰਦਰ ਭੱਲਾ ਦੀ ਕਾਮੇਡੀ ਦੀ ਤਾਰੀਫ ਕਰਦਿਆਂ ਕਿਹਾ ਕਿ ਜਸਵਿੰਦਰ ਭੱਲਾ ਨੇ ਸਿਰੇ ਦੀ ਕਾਮੇਡੀ ਕੀਤੀ ਜੋ ਕਿ ਵਿਸ਼ਵ ਪੱਧਰ ‘ਤੇ ਪ੍ਰਸਿੱਧ ਹੋਈ। ਉਨ੍ਹਾਂ ਅੱਗੇ ਕਿਹਾ ਕਿ ਜਦੋਂ ਇਸ ਸਮਾਗਮ ‘ਚ ਸ਼ਾਮਿਲ ਹੋਣ ਦਾ ਸੱਦਾ ਉਨ੍ਹਾਂ ਨੂੰ ਆਇਆ ਤਾਂ ਉਨ੍ਹਾਂ ਨੇ ਪੁੱਛਿਆ ਕਿ ਫੰਕਸ਼ਨ ਤਾਂ ਕਰ ਰਹੇ ਹਾਂ ਠੀਕ ਹੈ।

ਪਰ ਅਸੀਂ ਲੋਕਾਂ ਨੂੰ ਕੀ ਦੇ ਕੇ ਜਾਵਾਂਗੇ ।ਭੱਲਾ ਸਾਹਿਬ ਦੀ ਯਾਦ ਤਾਂ ਹਮੇਸ਼ਾ ਰਹਿਣੀ ਚਾਹੀਦੀ ਹੈ। ਇਸ ਲਈ ਮੈਂ ਉਸੇ ਵੇਲੇ ਜੀਟੀਸੀ ਪੰਜਾਬੀ ਦੀ ਸੀਈਓ ਪੱਲਵੀ ਸ਼੍ਰੀਵਾਸਤਵ ਨੂੰ ਕਿਹਾ ਕਿ ਆਪਾਂ ਜਸਵਿੰਦਰ ਭੱਲਾ ਜੀਟੀਸੀ ਕਾਮੇਡੀ ਅਵਾਰਡ ਸ਼ੁਰੂ ਕਰਾਂਗੇ ਅਤੇ ਜੂਨ ‘ਚ ਇਹ ਅਵਾਰਡ ਸ਼ੁਰੂ ਕੀਤੇ ਜਾਣਗੇ । ਜਿਸ ‘ਚ ਦੁਨੀਆ ਭਰ ਦੇ ਮਸ਼ਹੂਰ ਕਾਮੇਡੀਅਨ ਅਤੇ ਉੱਭਰਦੇ ਹੋਏ ਕਾਮੇਡੀ ਕਲਾਕਾਰਾਂ ਨੂੰ ਵੀ ਇਸ ‘ਚ ਸ਼ਾਮਿਲ ਕੀਤਾ ਜਾਵੇਗਾ”।

- GTC PUNJABI