ਵਿਆਹੁਤਾ ਔਰਤ ਦੀਆਂ ਰੀਝਾਂ ਨੂੰ ਬਿਆਨ ਕਰਦਾ ਜਸਬੀਰ ਜੱਸੀ ਦਾ ਗੀਤ ‘ਅੱਡੀਆਂ’ ਰਿਲੀਜ਼

ਜਸਬੀਰ ਜੱਸੀ (Jasbir Jassi) ਦੀ ਆਵਾਜ਼ ‘ਚ ਨਵਾਂ ਗੀਤ ‘ਅੱਡੀਆਂ’ ਰਿਲੀਜ਼ ਹੋ ਚੁੱਕਿਆ ਹੈ। ਇਸ ਗੀਤ ‘ਚ ਇੱਕ ਵਿਆਹੁਤਾ ਔਰਤ ਦੇ ਸੁਫ਼ਨੇ ਨੂੰ ਬਿਆਨ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਹੈ ਕਿ ਕਿਸ ਤਰ੍ਹਾਂ ਤੰਗੀਆਂ ਤੁਰਸ਼ੀਆਂ ਨੂੰ ਹੰਢਾਉਂਦੀ ਹੋਈ ਇੱਕ ਵਿਆਹੁਤਾ ਔਰਤ ਆਪਣੇ ਸੁਫ਼ਨਿਆਂ ਨੂੰ ਮਾਰਦੀ ਹੈ। ਉਸ ਨੂੰ ਆਪਣੇ ਪਤੀ ਤੋਂ ਬੜੀਆਂ ਉਮੀਦਾਂ ਹੁੰਦੀਆਂ ਹਨ ਕਿ ਉਸ ਨੂੰ ਉਹ ਗਹਿਣੇ ਗੱਟੇ ਲੈ ਕੇ ਦੇਵੇਗਾ । ਪਰ ਘਰ ਦੀਆਂ ਜ਼ਿੰਮੇਵਾਰੀਆਂ ਅਤੇ ਕਮਾਈ ਘੱਟ ਹੋਣ ਦੇ ਕਾਰਨ ਉਸ ਦਾ ਪਤੀ ਉਸ ਦੀਆਂ ਸਾਰੀਆਂ ਰੀਝਾਂ ਨੂੰ ਪੂਰਾ ਨਹੀਂ ਕਰ ਪਾਉਂਦਾ ।

ਪਰ ਪਤੀ ਦਾ ਪਿਆਰ ਕਿਤੇ ਨਾ ਕਿਤੇ ਇਨ੍ਹਾਂ ਸਾਰੀਆਂ ਰੀਝਾਂ ਤੋਂ ਉੱਪਰ ਹੁੰਦਾ ਹੈ। ਕਿਉਂਕਿ ਜਿੱਥੇ ਪਤੀ ਦਾ ਸਾਥ ਤੇ ਪਿਆਰ ਮਿਲੇ ਤਾਂ ਔਰਤ ਹੱਸ ਖੇਡ ਕੇ ਆਪਣੀ ਜ਼ਿੰਦਗੀ ਗੁਜ਼ਾਰ ਲੈਂਦੀ ਹੈ। ਫਿਰ ਗਹਿਣੇ ਗੱਟਿਆਂ ਦੀ ਵੀ ਕੋਈ ਪਰਵਾਹ ਉਸ ਨੂੰ ਨਹੀਂ ਰਹਿੰਦੀ । ਇਹੀ ਕੁਝ ਇਸ ਗੀਤ ‘ਚ ਬਿਆਨ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਹੈ।

ਇਸ ਗੀਤ ਦੇ ਬੋਲ ਸੁਰਿੰਦਰ ਦਾਊਮਾਜਰਾ ਦੇ ਵੱਲੋਂ ਲਿਖੇ ਗਏ ਹਨ ਅਤੇ ਮਿਊਜ਼ਿਕ ਸੇਜੀ ਢਿੱਲੋਂ ਦੇ ਵੱਲੋਂ ਦਿੱਤਾ ਗਿਆ ਹੈ। ਫੀਮੇਲ ਮਾਡਲ ਦੇ ਤੌਰ ਸਾਕਸ਼ੀ ਨੇ ਕੰਮ ਕੀਤਾ ਹੈ ਅਤੇ ਮੇਲ ਮਾਡਲ ਦੇ ਤੌਰ ‘ਤੇ ਖੁਦ ਜਸਬੀਰ ਜੱਸੀ ਨਜ਼ਰ ਆ ਰਹੇ ਹਨ । ਇਸ ਗੀਤ ਨੂੰ ਸਰੋਤਿਆਂ ਦਾ ਵੀ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਇਸ ਤੋਂ ਪਹਿਲਾਂ ਦੀ ਗੱਲ ਕਰੀਏ ਤਾਂ ਜਸਬੀਰ ਜੱਸੀ ਕਈ ਹਿੱਟ ਗੀਤ ਪੰਜਾਬੀ ਇੰਡਸਟਰੀ ਨੂੰ ਦੇ ਚੁੱਕੇ ਹਨ ।