ਅਨੀਤਾ ਸਮਾਣਾ ਤੇ ਵੀਤ ਬਲਜੀਤ ਦਾ ਨਵਾਂ ਗੀਤ ‘ਰੈੱਡ ਬੁੱਲਾਂ’ ਰਿਲੀਜ਼, ਸਾਲਾਂ ਬਾਅਦ ਅਨੀਤਾ ਸਮਾਣਾ ਦੀ ਵਾਪਸੀ

ਅਨੀਤਾ ਸਮਾਣਾ ਤੇ ਵੀਤ ਬਲਜੀਤ ਦਾ ਨਵਾਂ ਗੀਤ ‘ਰੈੱਡ ਬੁੱਲਾਂ’ ਰਿਲੀਜ਼ ਹੋ ਚੁੱਕਿਆ ਹੈ। ਇਸ ਗੀਤ ਦੇ ਜ਼ਰੀਏ ਅਨੀਤਾ ਸਮਾਣਾ ਨੇ ਸਾਲਾਂ ਬਾਅਦ ਪੰਜਾਬੀ ਗਾਇਕੀ ਦੇ ਖੇਤਰ ‘ਚ ਕਦਮ ਰੱਖਿਆ ਹੈ। ਇਸ ਗੀਤ ਨੂੰ ਸਰੋਤਿਆਂ ਦੇ ਵੱਲੋਂ ਪਸੰਦ ਕੀਤਾ ਜਾ ਰਿਹਾ ਹੈ ਅਤੇ ਫੈਨਸ ਨੂੰ ਵੀ ਇਹ ਗੀਤ ਕਾਫੀ ਪਸੰਦ ਆ ਰਿਹਾ ਹੈ। ਗੀਤ ਦੇ ਬੋਲ ਖੁਦ ਵੀਤ ਬਲਜੀਤ ਦੇ ਵੱਲੋਂ ਲਿਖੇ ਗਏ ਹਨ ਅਤੇ ਵੀਡੀਓ ਸਟਾਲਿਨਵੀਰ ਦੇ ਵੱਲੋਂ ਬਣਾਇਆ ਗਿਆ ਹੈ।

ਫੀਚਰਿੰਗ ‘ਚ ਵੀਤ ਬਲਜੀਤ ਤੇ ਸ਼੍ਰਿਸਟੀ ਮਾਨ ਦਿਖਾਈ ਦੇ ਰਹੇ ਹਨ। ਗੀਤ ਫੈਨਸ ਨੂੰ ਪਸੰਦ ਆ ਰਿਹਾ ਹੈ ਤੇ ਹਰ ਕੋਈ ਵੀਤ ਬਲਜੀਤ ਦੇ ਇਸ ਉਪਰਾਲੇ ਦੀ ਵੀ ਸ਼ਲਾਘਾ ਕਰ ਰਿਹਾ ਹੈ। ਜਿਨ੍ਹਾਂ ਨੇ ਅਨੀਤਾ ਸਮਾਣਾ ਨੂੰ ਗੀਤ ‘ਚ ਕੰਮ ਕਰਨ ਦਾ ਮੌਕਾ ਦਿੱਤਾ ਹੈ। ਅਨੀਤਾ ਸਮਾਣਾ ਨੇ ਰਾਜ ਬਰਾੜ ਦੇ ਨਾਲ ਕਈ ਹਿੱਟ ਗੀਤ ਗਾਏ ਸਨ ਅਤੇ ਪਿਛਲੇ ਕਈ ਸਾਲਾਂ ਤੋਂ ਉਹ ਪੰਜਾਬੀ ਇੰਡਸਟਰੀ ‘ਚ ਸਰਗਰਮ ਹਨ ਅਤੇ ਇੱਕ ਤੋਂ ਬਾਅਦ ਇੱਕ ਹਿੱਟ ਗੀਤਾਂ ਦੇ ਨਾਲ ਸਰੋਤਿਆਂ ਦਾ ਮਨੋਰੰਜਨ ਕਰਦੇ ਆ ਰਹੇ ਹਨ ।

ਉਨ੍ਹਾਂ ਦੇ ਹਿੱਟ ਗੀਤਾਂ ਦੀ ਲਿਸਟ ਕਾਫੀ ਲੰਮੀ ਹੈ। ਪਰ ਕੁਝ ਸਮਾਂ ਉਹ ਗਾਇਕੀ ਤੋਂ ਦੂਰ ਹੋ ਗਏ ਸਨ, ਕਿਉਂਕਿ ਉਨ੍ਹਾਂ ਦੇ ਆਰਥਿਕ ਹਾਲਾਤ ਬਹੁਤ ਮਾੜੇ ਹੋ ਗਏ ਸਨ । ਪਰ ਮੰਦਹਾਲੀ ਦੇ ਇਸ ਦੌਰ ‘ਚ ਉਨ੍ਹਾਂ ਦੀ ਬਾਂਹ ਕਿਸੇ ਨੇ ਨਹੀਂ ਸੀ ਫੜ੍ਹੀ। ਜਿਸ ਤੋਂ ਬਾਅਦ ਹੁਣ ਵੀਤ ਬਲਜੀਤ ਨੇ ਉਨ੍ਹਾਂ ਦੀ ਸਾਰ ਲਈ ਅਤੇ ਹੁਣ ਦੋਵਾਂ ਦਾ ਇਹ ਗੀਤ ਰਿਲੀਜ਼ ਹੋਇਆ ਹੈ।